شعبيات الشاعر سالم العالم … تخطر علي

( شعبيات سالم العالم )

شعر : سالم العالم

تخطر عليْ

تخطر عليْ في عز ضيقة علمي
تهدا الخواطر ولافكار تروق
تخطر عليْ ما بين نومي وحلمي
نصحى ونا كلي حنين وشوق
ياريت تسمح لي نجيك حتى ولو عابر سبيل
ياريتني نخطر عليك واْتديرها فيا جميل
ياريتني نخطر عليك كيف ما تخطر عليْ
في عز ضيقة علمي

ياريت تعرف كم .. عليْ بابك وقفت .. ودمعتي مهدورة
وياريت تعرف كم .. من عندك رجعت .. وخطوتي مكسورة
وكم وتوتّت .. ما طاوع لساني بوحي
وكم داريت .. عن عينك نزيف جروحي
وكم مرة لمحتك تبْرق في ظلامي ضي
وكم مرة دعيت الله تلمحني .. وساولت النبي
نخطر عليك كيف ما تخطر عليْ
في عز ضيقة علمي

خايف انا ماتودّني .. لا تحس بللّي فيا
خايف انا لو تصدّني .. تذبل ورود الشوق بين اْيديا
لكن وانا خايف..انا..مازال عندي امل
اني اْنتغلب ع الخجل … ونقولك نبيك
ونلملم اشواقي غي عجل … ونجيك ونلاقيك
فاتح ذراعك ليا
ليام ما يصعب عليها شي تخطر علي

القاهرة
27/1/2004
من ديوان ( ابتسمي )